Бүген Сәфәр урта гомуми белем бирү мәктәбендә “Белем сыйфатын күтәрүдә идарә итүнең эффектлылыгы” темасына районның укыту-тәрбия эшләре буенча директор урынбасарлары семинары булып узды. Семинар барышында математика, рус әдәбияты, туган тел, география, музыка, физкультура фәннәреннән укытучылар ФДББС ларына туры килүче ачык дәресләр күрсәттеләр. Яңа ел уңаеннан укучылар һәм мәктәп укытучылары көче белән әзерләнгән концерт бик җылы тәэсирләр калдырды. Семинар темасы астында “World cafe” методикасы кулланып оештырылган эшлекле уен бик отышлы булды. Мәктәпләрдә сәләтле балалар белән эшчәнлекнең торышы турында әңгәмә корылды. Белем бирү минимумының мәктәпләрдә ничек оештырылуы буенча түгәрәк өстәл артында сөйләшү дә үз нәтиҗәләрен бирер дип ышанабыз.