Актаныш районы Башкарма комитетының социаль мәсьәләләр буенча урынбасары Дилбәр Әнвәрова, “Ак калфак” татар хатын-кызлары республика иҗтимагый оешмасы рәисе, абруйлы якташыбыз Кәдрия Идрисова, урындагы “Ак калфак” бүлекчәсе рәисе, районның архив җитәкчесе Айгөл Галимҗанова һәм Сарман, Илеш, Тукай районыннан килгән делегация “Тылсым” балалар бакчабызда кунакта булдылар. Аларны биредә чәк-чәк, ипи тоз белән, изге гореф-гадәтләрне искә алып тәрбиячеләр һәм балалар белән каршы алдык. Затлы кунакларны балалар бакчасы җитәкчесе Миләүшә Вахитова бакчабыз эшчәнлеге белән таныштырды. “Кырым татарлары” биюен хезмәткәрләребез зур осталык белән башкарып чыктылар.  Милли-мәдәни тарихыбызны тасвирлаган почмакларны карау, мастер-класс белән үрелеп барды чара. Боз китү йоласын мәктәпкә әзерлек төркеме балалары бик күңелле, матур итеп әзерләп, тәкъдим иттеләр. Балаларның йөзеннән шатлык хисләре бөркелеп торды, алар тырышып биеделәр, җырладылар.  Кәдрия Рәес кызы әлеге тәрбияви, милли асыллыгыбызны ачык күрсәткән, данлаган чарага, боз китү йоласын оештыру эшенә югары бәя бирде.