Балаларның танып белү үсешендә, экологик мәдәният тәрбияләүдә, табигатьтә үз-үзеңне дөрес тота белергә өйрәтүдә тәрәзә төбендә “бакча” үстерү зур әһәмияткә ия. “Тылсым” балалар бакчасында тәрбияләнүчеләр белән ел саен шулай  бүлмәдәге тәрәзә төпләрен тутырып үләннәр, тәмләткечләр, чәчәк, яшелчә орлыклары чәчәбез, суган утыртабыз. Нәни бакчачылар тәрәз төбендәге “түтәлләрне” сулар сибеп, карап-тәрбияләп үстерәләр, үзләренең  хезмәт нәтиҗәсен – күз алларында яшелләнгән “бакча”ны күреп, чын күңелдән сөенәләр, су сибү өчен чират торалар.  Үлән-тәмләткечләрнең витаминнарга бай булуын, сәламәтлек  өчен файдасын да алар яхшы белә. Күмәкләшеп эшләгән мондый тәҗрибәләр балаларны хезмәт сөяргә, үз куллары белән яшеллек, матурлык тудырырга өйрәтә һәм, әлбәттә, экологик тәрбия чарасы булып тора.