5 октябрьдә Россиядә генә түгел, дөньяның күп илләрендә Халыкара укытучылар көнен билгеләп үтәләр. Агымдагы елда Актаныш мөгаллимнәре өчен 4 нче октябрь көнне үк районыбызның Әлфия Авзалова исемендәге мәдәният йортында бәйрәм тантанасы оыштырылды һәм күп кенә укытучылар хәрмәтләде. Актаныш районы башлыгы Э.Н. Фәттахов хезмәтләрендә югары нәтиҗәгә ирешүче мөгаллимнәргә Мактау грамоталары, Рәхмәт хатлары тапшырды. Бу бәйрәмдә хезмәттәшләребез - мәктәбебез директоры И.И.Шәрипов Татарстан Республикасы Мәгариф һәм фән министрлыгының Мактау грамотасы белән бүләкләнде, башлангыч сыйныф укытучысы Ф.М.Сарварова “Иң яхшы башлангыч сыйныф укытучысы” номинациясендә җиңүче буларак Мактау грамотасына лаек булды. Аларга һәм коллективтагы башка педагогларга киләчәктә дә уңышлар телибез!

4 октябрь көнне районыбызның Әлфия Авзалова исемендәге мәдәният йортында укытучылар көненә багышланган бәйрәм тантанасы уздырылды. Бәйрәмдә лаеклы ялдагы өлкән укытучы Усманова Тәхия Әхтәм кызы озак еллар директорның тәрбия эшләре буенча урынбасары булып эшләгәне өчен бүләкләнде. Ул хәзерге көндә дә мәктәп белән элемтәсен югалтмый, балаларга әхлак дәресләрен төшендерүен дәвам итә. Аңа исәнлек-саулык, ныклы сәламәтлек теләп, укытучы профессиясенә тугры булып калганы өчен чиксез рәхмәтебезне җиткерәбез!

2-3 октябрь көнне Яңа Әлем төп гомуми белем бирү мәктәбендә эвакуация буенча өйрәнүләр үткәрелде. Бу өйрәнүләр вакытында мәктәп директоры И.И.Шәрипов, тормыш иминлеге нигезләре укытучысы И.М.Сәхипов җитәкчелек иттеләр. Тревога вакытында үз-үзеңне ничек тоту буенча тормыш иминлеге нигезләре укытучысы И.М.Сәхипов укучыларга инструктаж үткәрде, кимчелекләргә басым ясады. Мәктәптән барлык укучылар, укытучылар, техник эшчеләр тиз арада чыгып беттеләр, эвакуация уңышлы тәмамланды.

Всероссийское тестирование педагогов проходит с 6 августа по 19 ноября 2018 года. До конца ноября 2018 года будут определены победители тестирования на федеральном и региональном уровне. Тестирование проводится на сайте: https://www.единыйурок.рф

2 октябрь көнне Яңа Әлем төп гомуми белем бирү мәктәбендә 9 нчы сыйныф укучыларының ата-аналары җыелышы булып узды. Көн тәртибендә түбәндәге мәсьәләләр каралды: 1.Төп дәүләт имтиханнарына әзерлек буенча мәктәп директоры И.И.Шәрипов, укыту-тәрбия эшләре буенча директор урынбасары Р.Н.Фәйзрахманова чыгышлары тыңланды. 2.Төп һәм сайлап алу имтиханнары буенча математика укытучысы Ф.Я.Якупова, рус теле укытучысы А.И.Габдрахманова, җәмгыять белеме укытучысы А.А.Мадияров үз фикерләрен әйттеләр. 3.Класс җитәкчесе Г.Р.Хәмидуллина ата-аналар белән әңгәмә үткәрде, аларга үзенең киңәшләрен бирде.

Илебез буенча 1 октябрьдә Өлкәннәр көне билгеләп үтелә. Төрле җирләрдә хөрмәтле картларыбызны котлаулар, бүләкләүләр белән искә алабыз. Кадерле әби-бабаларыбыз! Заман авырлыкларына бирешмичә илебез уңышы өчен көчегезне кызганмагансыз. Бу дөньяда куйган хезмәтләрегез, кылган изгелекләрегез өчен рәхмәт сезгә! Без, яшьләр, сезнең киңәшләрегездән тайпылмабыз, үрнәк булырга тырышырбыз! Саулык-сәламәтлектә, дөньяга ямь биреп яшәгез, урыннарыгыз өйнең түрендә булсын! Бәйрәмегез белән!

30 нчы сентябрь көнне районда өлкәннәр көненә багышланган ярминкә оештырылды. Анда мәктәбебез коллективы да катнашты. Яңгырлы көн булуга да карамастан, Яңа Әлем мәктәбе хезмәткәрләре ачык йөз белән халыкка үзләренең уңышларын тәкъдим иттеләр, кайнар чәйләре белән сыйладылар.

29 сентябрь көнне мәктәбебез бакчасында зур өмә оештырылды. Анда 5-9 нчы сыйныф укучылары һәм укытучылар катнашты. 5 нче сыйныф укучылары чәчәк, укроп орлыкларын җыеп, киләсе ел өчен әзерләп куйдылар. 6 нчы сыйныфлар сарымсак кисү, помидор җыю белән мәшгуль булдыдар. 7 нче сыйныфлар чөгендер алсалар, 8 нче һәм 9 нчы сыйныф укучылары карлыган араларын чистартып, сарымсак утырту өчен түтәл әзерләделәр. Мәктәп бакчасыннан сөендерерлек зур уңыш җыеп алынды.

Атна башыннан мәктәп дирекциясе тарафыннан яшь укытучыларның дәресләре тыңланды. Мәктәп директоры һәм директор урынбасарлары атна дәвамында инглиз теле һәм татар теле укытучыларының дәресләрендә, башлангыч сыйныф укытучысының рус теле дәресендә булдылар. Дәресләргә үзанализ һәм анализ ясалды.

28 сентябрь көнне мәктәбебездә әдәби-тәрбияви музыкаль сәгатьтә артист, юморист, җырчы Алмаз абый Хәмзин һәм язучы Алмаз абый Гыймадиев кунак булдылар. Чара барышында алар укучылар белән әңгәмә кордылар, табышмаклар әйттеләр, тормышта булган төрле вакыйгалар хакында фикер алыштылар. Күренекле шәхесләр кулыннан бүләк алу, алар белән кул кысып күрешү укучылар күңелендә якты эз булып уелып калды. Ахырдан укучылар һәм укытучылар кунаклар белән истәлеккә фотога төштеләр.