Юл хәрәкәтенең яшь инспекторлары арасындагы бәйге һәр елны Мәгариф һәм фән министрлыгы, Россия Эчке эшләр министрлыгы белән берлектә үткәрелә. Аның максаты – балалар катнашындагы юл-транспорт һәлакәтләрен булдырмау, юл хәрәкәте кагыйдәләрен яхшы белүче буын тәрбияләү, укучыларда сәламәт һәм куркынычсыз яшәү рәвеше формалаштыру. Район мәктәпләреннән килгән командалар бу көнне һәрьяклап сынала: каршылыклар аша велосипедта фигуралы йөрү, эрудитлар турнирында, иҗади, плакатлар бәйгеләрендә катнашу, һәлакәтләр вакытында беренче медицина ярдәмен дә күрсәттү кебек ярышлар була. Юл билгеләре күп нәрсә турында сөйли. Аларның һәрберсе тирән мәгънәгә ия һәм һәлакәтләр булмасын өчен куелган. Шуңа күрә һәр кеше: әтиме-әниме, абыймы-энеме, студент, укытучы, директор, профессор, министрмы – юлларда бик сак булырга, кагыйдәләрне төгәл үтәргә тиеш.