“ТР Актаныш муниципаль районы балалар сәнгать мәктәбе” укучылары бу уку елының шушы  чоры аралыгында нинди яңа һөнәрләр үзләштерүләрен, осталыкларын арттыруларын  район мәдәният сарае сәхнәсендә,  сәнгать мәктәбенең иҗат концертында күрсәттеләр. Әлеге концертта Киров сәнгать мәктәбеннән дә укучылар үзләренең һөнәрләрен күрсәтте.

Концертта укучылар җыр-биюгә маһирлыкларын,  баян, скрипка, фортепьяно,гитара һ.б. уен коралларында уйнау осталыкларын күрсәттеләр.

Район башкарма комитеты җитәкчесенең урынбасары Л.Шәмсунова укучыларга, укытучыларга бу гүзәллек дөньясын тудыруда куйган тырышлыклары өчен рәхмәтләрен җиткерде: “Һәр кеше дә, һәр бала да нинди дә булса табигый сәләткә ия. Без –ата-аналар, өлкәннәр әлеге сәләтне ачу, үстерү өстендә эшләргә, балаларның киләчәген, алдагы язмышын кайгыртырга бурычлыбыз”,- дип белдерде ул, һәм кыз-малайларрга киләчәктә дә уңышлар теләде.