"ХАНЛЫКЛАР" ПРОЕКТЫ гимназиябездә, тарихи эзләнү буларак, тәүге адымын ясады. Гимназиябез директоры Венера Хәмәтнәсыйх кызы Хәева-Хәмәтҗанова, урынбасарлар, сыйныф җитәкчеләре, укучылар һәм ханлыклар ярышын алып баручы - Татар китабы йорты директоры Айдар Рәсим улы Шәйхин дә әлеге дәрәҗәле кичәгә милли киемнәрдән килгәннәр иде.
Мәртәбәле жюри: Татарстанның Халык укытучылары Дилара Дуглас кызы Хөббетдинова, Ләйсән Галиәкбар кызы Әминова, тарих укытучысы Марат Ильсур улы Гыйльметдинов, директорның тәрбия буенча киңәшчесе Салават Мөҗәһит улы Котлыяров чыгышларга бәя дә бирделәр, тарихи мәгълүматларга тукталып, киләчәк бәйгеләр өчен юнәлеш-максат та билгеләделәр.
Ханлыклар проектына Актаныш районы башлыгы Ленар Рафак улы Зарипов та үзенең хәер-фатихасын бирде. Гимназия коллективына рәхмәт белдереп, тарихыбызны тирәнтен өйрәнүдә уңышлар теләде.
Беренче бәйге ханлыкларның үзләрен тәкъдим итү, байракларны яклау белән башланды.
Казан кунаклары - музыкант яшьләребез Айдар Габдрәхимов, Ильяс Фәрхуллин ханлыклар бәйгесенең музыкаль бизәлешен тәэмин итеп, шул чорларның милли аһәңнәрен яңгыратты.