13-15 октябрь - дөньякүләм татар теленнән белем тикшерү “Татарча диктант” акциясе көннәре. Гимназиябез укучылары да бүген “Татарча диктант” акциясенә кушылды.
“Татарча диктант” акциясендә Татарстанда яшәүчеләр – Рөстәм Галиуллинның “Таҗеддин Ялчыгол” әсәреннән өзек (“Васыять” исемле җыентыгыннан), Россия төбәкләрендә – Марсель Галиевның “Тимә, яшәсен!” әсәреннән өзек, ә чит илләрдә гомер итүче татарлар – Фоат Садриевның “Туган җир” әсәреннән өзек яза.
Рөстәм Галиуллинның “Таҗеддин Ялчыгол” әсәреннән өзекне 8 сыйныфлар өчен - Татарстан Республикасының атказанган сәнгать эшлеклесе, Татарстан Республикасының Габдулла Тукай исемендәге Дәүләт премиясе лауреаты Илфак Мирза улы Ибраһимов-Мөхәммәт Мирза, 10 сыйныфлар өчен Татарстанның атказанган артисты Нур Мәкәрим улы Хөсәенов укыды.
Быел “Татарча диктант” акциясе сигезенче тапкыр оештырыла. Ул –хәзерге вакытта Татарстан Республикасы, Россия һәм чит илләрдә яшәүче милләттәшләребезне берләштерә торган проектларның берсе. 2022 елда “Татарча диктант” акциясендә бер миллионнан артык кеше катнашты. Диктантны 31 ил һәм Россиянең 74 төбәгендә яшәүче милләттәшләребез язды.