“Лидерлык дәресе” кысаларында, гимназиябез укучыларының Актанышның, республиканың мәртәбәле шәхесләре белән очрашуы быел яңа – тагын да камилләшкән формада дәвам итте.
Заман таләбе булган һәм инде укучыларның яратып өлгергән “Лидерлык дәресе” быел тулы бер цикл рәвешендә барачак. Актаныш районы башлыгы Ленар Рафак улы Зарипов бүген әлеге циклның беренче дәресен ачык формада үткәрде һәм ул “Патриотизм” темасына багышланды. Туган илне яратуның мәгънәсен Ленар Рафак улы үзенең яшәү һәм тормыш тәҗрибәсе аша гади һәм тирән мәгънәле итеп аңлатты.
Район башлыгы Ленар Зариповның әйткән фикерләре еллар аша укучыларга төрле мәгънәдә ачыла бара торган – ут-су кичкән һәм бүген дә илнең, республиканың, районның киләчәге өчен җаваплы урында хезмәт куючы көчле рухлы ир-ат, җитәкче фикере. Без аның сезгә тулы язмасын тәкъдим итәчәкбез. Һәр кешене дә уйландыра, үзенә яңа максатлар билгели торган тормыш дәресе ул – гимназиябезнең “Лидерлык дәресләре”.