«Шимбә мәктәбе» проекты дәвам итә. 13 нче октябрьдә Иске Кормаш мәктәбендә 2 нче очрашу уздырылды. 1-9 нчы сыйныф укучылары белән «Гыйлем» командасы әгъзалары һәм КФУның дин белеме кафедрасы студентлары аралашты.
            Булат Шәймиев үзенең иҗаты һәм кызыксынулары белән таныштырды, татарча, инглизчә һәм алманча җырлар башкарды, шулай ук телләр белү һәм өйрәнү ысуллары хакында сөйләде. Фәлсәфә һәм фикер тәҗрибәләре турында Николай Финк бәян итте, Георгий Савин исә хәзерге акча системасының килеп чыгышы турында тарихи лекция укыды һәм үз коллекциясендәге төрле тәңкәләр белән таныштырды. Алина Галиәхмәтнең чыгышы фото һәм видео сәнгате турында булды.

«Шимбә мәктәбе» – «Гыйлем» үзәге һәм Актаныш гимназиясе тарафыннан оештырылган белем бирү проекты. Аның максаты – мәктәп укучыларының күзаллавын һәм карашын киңәйтү, белем алуга һәм үзеңне үстерүгә өстәмә мотивация тудыру. Идея авторлары – Ленар Хусаинов, Айдар Шайхин.