Татарстан республикасы баш казые, дин эшлеклесе,  авыл хуҗалыгы белгече, хаҗи-әкбәр Җәлил хәзрәт Фазлыев гимназия коллективы белән очрашты. Әлеге мәгънәви һәм әхлакый чарада Актаныш муниципаль районы Башкарма комитет җитәкчесе Энгель Нәвап улы Фаттахов, район имам-мөхтәсибе Руслан хәзрәт Мортазин, социаль мәсьәләләр буенча Башкарма комитет җитәкчесе урынбасары Ләйсән Фоат кызы Нурлыева, мәгариф идарәсе җитәкчесе Илшат Рәфит улы Вахитов, район үзәге мәктәпләре, техникум директорлары һәм директор урынбасарлары, дин әһелләре катнашты. Җәлил хәзрәт бик үтемле рәвештә, дөньяви һәм дини гыйлемнәрнең әһәмияте, зарарлы гадәтләрнең кеше калебенә зыяны хакында аңлатты, тормышчан дәлилләр белән исбатлап күрсәтте. Катнашучыларны кызыксындырган сорауларга җаваплар бирде.