Гимназия базасында " Туган телем - әдипләр теле" гомуми урта белем бирү йортлары укучыларының V республика фәнни-эзләнү конференциясе  оештырылды. Быел ул драматург, Татарстан Язучылар берлеге рәисе, якташыбыз Данил Салихов иҗатын өйрәнүгә багышланды. Конференциягә республика районнарыннан кырыкка якын катнашучы килде, өч секциядә эшчәнлек алып барылды. Жюри составында Данил Салихов, Ркаил Зәйдулла, Ләбиб Лерон, Рәдиф Сәгъди, Газинур Морат кебек танылган язучылар һәм Казан, Яр Чаллы югары уку йортларының тел галимнәре рәислек итте. Конференциянең бүләкләү тантанасында С. Өметбаев исемендәге Минзәлә татар дәүләт драма театры чыгышы тамашачылар күңеленә хуш килде. Җиңүче укучылар Татарстан Республикасы Мәгариф һәм фән министрлыгы грамоталары һәм Данил Салихов тарафыннан тапшырылган  китап җыентыкларына  ия булдылар.