Гимназиядә инглиз теле укытучыларының төбәкара семинар-утырышы булып узды. Бирегә Татарстанның Сарман, Әлмәт, Минзәлә, Мөслим районнарыннан, Башкортстан Республикасының Илеш районыннан укытучылар килде. Гимназия укытучылары Тимирова Лилия Фнун кызы, Валиева Резеда Фликс кызы һәм Пучы урта мәктәбеннән Гобәйдуллина Ләйсән Тахир кызы дәрес фрагментлары күрсәтте. Казанның 2нче, 4нче, 7нче лицей-интернатларыннан килгән Колесников Денис Петр улы, Солтанов Алат Әлфәр улы һәм Яхин Илдар Ясар улы инглиз теленнән БДИга һәм Бөтенроссия олимпиадасына әзерләнү методикалары, проблемалары һәм аларны чишү юллары белән уртаклаштылар, СLILның инглиз телен укытуда файдалы яклары турында сөйләп киттеләр. Шулай ук, семинарга, Казанның ЛингвоПарк чит телләр өйрәнү үзәге үзенең методик кулланмалар күргәзмәсен алып килде.