15 февраль көнне татар халкының бөек улы, каһарман шагыйрь Муса Җәлилнең туган көне.
М. Җәлилнең әдәби мирасы күп милләтле совет әдәбиятының кыйммәтле бер казанышы булып тора. Аның әсәрләре кешеләрдә матур, гуманистик тойгылар уята, аларны тормыштагы матурлыкны күрергә һәм шул матурлык өчен көрәшергә чакыра. Муса Җәлилнең исеме тарих битләренә алтын хәрефләр белән язылган, үзе үлсә дә, аның исеме, шигырьләре мәңгелек.
Туган телләр айлыгы кысаларында мәктәбебездә Муса Җәлилнең туган көненә багышланган кичә узды. Укучыларга Ландыш апалары Галиева Муса Җәлилнең тормыш юлы турында , аның иҗаты турында сөйләде, видеопрезентация күрсәтте. Татар теле һәм әдәбияты дәресләрендә алдан өйрәнгән, шагыйрьнең тормыш юлы һәм иҗаты турындагы кызыклы мәгълуматларны укучылардан викторина сораулары итеп бирде . Укучылар да җавапсыз калмыйча , тиз генә исләренә төшереп , җавап бирергә тырыштылар.
Викторинадан соң барлык укучылар да Муса Җәлилнең үзләре ятлаган шигырьләрен сөйләделәр. Һәр сөйләнгән шигырь сәнгатьле итеп , башкаларның күңелендә эз калдырырлык итеп сөйләү, публика каршында үзеңне матур итеп күрсәтә белү - укучыларның үзләре өчен куелган бурычлары иде. Укучыларга гына түгел , укытучыларның да күңелләренә хуш килгән иң -иң шигырьләр - 7 нче сыйныфларныкы булгандыр , мөгаен. Алар үзләренең образларын милли калыпта итеп әзерләгәннәр.
Муса Җәлилне һәр елны искә алу, аның иҗатын күңелләребездә саклау- барыбызның да изге бурычы.