Дәрес “Сабантуй – Тамчы-шоу” уены белән башланып китте. Укучылар өч төркемгә бүленеп, төрледән-төрле мавыктыргыч сорауларга, Р.Низамова иҗат иткән табышмакларга җаваплар таптылар.  Халык педагогикасына бәйле булган татар халык авыз иҗатын – мәкальләр, әкиятләрнең эчтәлеге буенча ясалган рәсемнәргә таянып, укучылар үзләренең сәләтләрен күрсәттеләр. Ахырда Р.Низамова белән җанлы әңгәмә үткәрелде. Монда укучылар үзләрен кызыксындырган сорауларга җаваплар таптылар. Язучы тарафыннан укучылар үзләренә бик күп мәгълүмат тупладылар. Рушания апа “Егет кешегә җитмеш төрле һөнәр дә аз” дигән девиз астында, балаларга тырышып укырга, ялкау булмаска һәм күп әдәби китаплар укырга өндәде. Дәрескә нәтиҗә ясап, мәктәп директоры Хәйретдинова Энҗе Җәмил кызы Рушания апаны юбилее белән котлады. Исәнлек-саулык, иҗади уңышлар теләде.