Бүген Тукай туган көнен каршылау алдыннан Салагыш мәктәбендә район мәгариф бүлеге җитәкчеләре, мәктәп директорлары, укыту-тәрбия эше буенча директор урынбасарлары катнашында " Мониторинг проблемных зон учебно-методической деятельности в малокомплектных сельских школах и определение задач на перспективу решения" темасына семинар узды. Чарада ветеран укытучылар Хабибуллина Тәнзилә, Шарипова Лениза, атказанган сәнгать эшлеклесе Хабибуллина Әлфия дә катнашты.
Иң элек укучылар, укытучылар коллективы кунакларны мәктәп тарихы белән таныштырды. Авыл музеена сәяхәт оештырылды.
Бу музейның дәвамчысы, мәктәп тарихын гынә үз эченә алган мәктәп музеен ачу тантанасы үтте.
Бу ел башыннан Салагыш мәктәбендә “Музей эшчәнлеге” түгәрәге оештырылды. Аның өчен экспонатлар, материаллар тупланды. Бу эштә ветеран укытучылар, мәктәпне тәмамлап чыккан укучылар һәм укытучылар актив катнашты. Алар ярдәме белән шактый материал тупланды. Әлеге күркәм музей “Әлифба – белем иленең чишмә башы”, “Кыңгыраулы мәктәп еллары”, “Алар безнең горурлык”, “Шушы җирдән, шушы туфрактан без”, “Укытучылар династиясе”, “И туган тел, и матур тел” экспозицияләрен үз эченә ала.
Шулай ук Бөек Ватан сугышында катнашкан мәктәп укытучылары турында белешмәләр,Әфган, Чечня, махсус хәрби операция зонасында катнашучы ир-егетләргә багышланган Хәрби дан зонасы белән таныштырылды.
Көн бик эшлекле һәм бәйрәмчә атмосферада узды.