Иж-Бубый мәктәп тарихы музеен оештырган, аны 20 елга якын җитәкләгән Рәмзия Арслан кызы Хәлиуллинаның тууына 90 ел тулды. Шул уңайдан мәктәптә, фидакарь хезмәт куеп, авыл халкының гына түгел, бәлки чит төбәкләрдәге һәм мәмләкәтләрдәге татарларның ихтирамын яулаган ветеран педагогны искә алу кичәсе уздырылды.

Чарада укучылар Рәмзия апаның тормышы һәм хезмәт юлы белән таныштылар. Кунак булып килгән Лилия ханым Хәлиуллина Рәмзия апаның гаиләдә тоткан роле, аның сеңелләре Резилә һәм Резеданың, энесе Айдарның балаларына ясаган уңай йогынтысы турында сөйләде. Казан шәһәрендә яшәүче Ләйсән Хәйруллина да үзенең видеоязмасында апасын (бабасының сеңлесен) бары тик рәхмәт сүзләре белән искә алды, вафатына күп еллар үтсә дә, аны һаман да юксынып яшәве турында җиткерде.

Рәмзия Арслан кызы музей оештыру идеясе белән янып йөргән чорда директор булып эшләгән һәм аңа әлеге җиңел булмаган эшне башкарып чыгарга булышкан Раиф Мөхәммәтҗан улы Гәрәев үзенең чыгышында ветеран педагогның хезмәтенә югары бәя бирде, аның яшь буын өчен үрнәк алырдай шәхес икәнлеге турындагы фикерне басым ясап әйтте.

Чараны оештырган мәктәп тарихы музее җитәкчесе Алсу Фаат кызы Хисмәтуллина укытучысы Рәмзия Хәлиуллинаның дәресләре кызыклы узуы, аның укучыларының ныклы белемгә ия булулары турында сөйләде; күпләргә математика укытучысы, экономист һәм бухгалтер һөнәрләрен сайлауда юнәлеш биргән мөгаллимә булуы турында да искәртте.

Балаларның чыгышларын әзерләгән, үзе дә сәхнәләштерелгән эпизодта Рәмзия Арслан кызы ролен башкарган Алсу Галимулла кызы Абзалиевага зур рәхмәтебезне белдерәбез!