Музей җитәкчесе Гараев Раиф Мөхәммәтҗанович җитәкчелегендә бер төркем укучылар һәм укытучылар күрше Удмуртиянең Кыяс районы Первомайск мәктәбендә Бородино сугышында русларның җиңүенә багышланган чараларда катнаштылар. Иж елгасының арягында гына урнашкан булса да авылга юл ерактан әйләнгечтән уза. Иж күпере булган вакытта бабаларыбыз тормышы шушы авылларда яшәүче руслар, удмуртлар белән бәйләнгән булган, алар дус, бер-берсенә ярдәмләшеп яшәгәннәр. Бу очрашу дуслык җепләрен яңадан бәйләп, аннан соң  ныгытырга беренче адым булып торыр дип уйлыйбыз. Бәйрәмдә катнашкан Кыяс районы администрация башлыгы да, Первомайск мәктәбе укытучылары да, кичәне бизәгән Казаклар хоры да шундый ук фикердә булдылар. Укучылар бәйрәмнән соң "Русская изба" музеенда, Изге чишмәдә, Свято-Даниловский монастырьда экскурсиядә булдылар.