Бүген бакчабызда герой-шагыйрь - Муса Җәлилнең туган көне уңаеннан, шигырь бәйрәме гөрләп үтте.  Бәйрәм чарасы ике дәүләт телендә үрелеп барды. Балалар М.Җәлилнең шигырьләрен укыдылар, шагыйрьнең иҗатын һәм тормыш юлын чагылдырган, күп кенә кызыклы мәгълүмат тупланган презентация карадылар, ул балаларның яшь үзенчәлекләрнен истә тотып әзерләнгән иде. Бакчабыз ачылганнан бирле, әле бу вакыйга чагыштырмача бик күп вакыт үтмәсә дә, без йола, милли, спорт бәйрәмнәрен, балалар бакчасында белем һәм тәрбия бирү программасы буенча өйрәнелергә тиеш булган шәхесләрнең туган көннәрен  үткәреп, балаларга җиткереп барырга тырышабыз. Һәм әлеге чараларны үткәргәндә балаларга якын булган геройларга һәм жанрларга мөрәҗәгать итәбез! 

Ни чәчсәң, шуны урырсың, дигән халык. Чөнки замана балаларының сабый чагы, нигездә балалар бакчасында уза, бала күңеленә тәүге орлыклар шунда салына.Ул орлыклар, һичшиксез, милләтебезнеке һәм сәламәт булырга тиешләр. Нәниләргә алда әйтелгәннәрне кечкенәдән сеңдерә алсак, милләтебезнең киләчәге нык, сәламәт һәм өметле булыр!