Җиңүгә 77 ел.
   Югары Мәлемдә мәгариф отличнигы, сугыш ветераны Петр Абрамовны искә алдылар
Кичә - 4 майда  Югары Мәлем сигезьеллык мәктәбендә 35 ел мәктәпне җитәкләгән мәгариф отличнигы, сугыш ветераны Петр Абрамовны искә алдылар. Аның тууына -100, вафатына 30 ел. Аны искә алу кичәсенә мәктәп җитәкчелеге, укучылар, хезмәттәшләре, ветеран укытучылар, авыл халкы, Петр Абрамовның балалары, оныклары  катнашты. Ветеран укытучылар, хезмәттәшләре хәтер-хатирәләрен яңартты, ветаранның онык-оныкчыклары исә шигырь сөйләде. Кичә җан бәйрәме буларак җылы узды. Шунысы игътибарга лаек, Петр Абрамов Зәй матбугаты тарихында тирән эз калдырган шәхес, шактый еллар район газетасы хәбәрчесе, "Зәй офыклары" газетасының баш редакторы булып эшләгән Иван Гаврилович Глуховның бертуган агасы.
   Петр Абрамов 1922 елда Урта Баграж авылында туа,Түбән Багражда башлангыч мәктәпне тәмамлагач, укуын матур табигатьле  туган  авылында дәвам итә. Тырыш укучылардан була ул. Мәктәптән соң Якты Күл мәктәбенә башлангыч сыйныф укытучысы итеп эшкә жибәрәләр. Тик ул армия сафларына алына һәм  армиядә хәрби хезмәтен Забайкалье хәрби округында башлый. Ә бер елдан илдә сугыш башлана. Шанлы, дәһшәтле сугыш,  Петр Абрамов  фронтның алгы сызыгыннан атлый.
   Мәскәү янындагы сугышлар, Смоленск оборонасы...Яраланып, госпитальдә ятып чыга. Янә сугыш... Якташ көньяк-көнбатыш һәм Украина фронтлары, Днепрны кичә, кече лейтенантлар курсларында укый. Ровно, Дубно шәһәрләрен азат итүдә катнаша. Тагын яралана, ике айдана соң яңадан частька әйләнеп кайта. Бу юлы ул Львовка һөҗүмдә катнаша, Буг елгасын кичә. Биредә исә  кече лейтенант Петр Абрамов Кызыл йолдыз ордены белән бүләкләнә.
Сугыш кыза бара. Взвод командиры Петр Абрамов Сандомир шәһәре, Висла елгасы, Орданы кичә. Әһәмиятле күперләрнең берсен саклаудагы хезмәте өчен ул лейтенант Петр Абрамов 1 дәрәҗә Ватан сугышы орденына лаек була. Янә  яралар ала. Шулай итеп Петр Гаврилович Җиңү көнен госпитальдә каршылый. Якташ туган авылына 1945 елның августында кайта. Якташның сугышчан юлы һәм бүләкләре “Алар илгә җиңү алып кайтты” дип исемләнгән китапта урын алган.
   Илне торгызу еллары... Петр Гаврилович  Федот мәктәбендә укыта, аннан Чыбыклы һәм Сарсаз Баграж мәктәпләрендә военрук булып эшли. 1947 елда ул Югары Мәлем мәктәбенә директор  итеп билгеләнә. Белемгә омтылыш көчле булган егет  башта Алабуга, аннан читтән торып Казан педагогия институтын тәмамалый.  Югары Мәлем мәктәбе алтыпочмаклы ике бүлмәле йортта урнашкан була. Петр Гаврилович 1949-50 елларда Югары Мәлем дүртьеллык мәктәбен җидееллыкка үзгәртергә рөхсәт ала. Директор мәктәпкә барлык укучыны тартуны максат итеп, мәктәп яны участогы, остаханә, спорт мәйданчыгы булдыруга зур көч куя.  
   Югары белемле биолог җитәкчелегендә мәктәп бакчасына йөзләгән төп алма агачы, карлыган утыртыла, яшелчәләр үстерелә. Шулай итеп мәктәп шаулап-гөрләп торган белем учагына әйләнә.1962 елда мәктәп сигезьеллыкка үзгәртелә һәм 1965 елда интернат ачыла. Яңа мәктәп бинасы төзелә һәм ул 1984 елга кадәр файдаланыла. Шулай итеп, авылның агач мәктәбе тарихы Россиянең мәгариф отличнигы Петр Абрамов белән бәйле.
- Петр Гаврилович безне химия фәненнән укытты. Аның дәресләре кызыклы, мавыктыргыч уза, бик аңлаешлы итеп аңлата, бергәләп биремнәр, тигезләмәләр чишә идек. Шунысы кызыклы, ул дәресне тормыш. сугыш эпизодлары белән бәйләп аңлатты. Диңгез суын кайнатып, ничек итеп тоз алганнарын мавыктыргыч итеп сөйләгәне әле дә истә калган, - ди укучысы Разилә Камалиева.
   Петр Гаврилович 44 ел гомерен балалар тәрбияләү эшенә багышлый. Ул тормыш иптәше педагог Софья Егоровна белән алты бала - Альберт, Лидия, Зинаида, Валера, Владимир, Римманы үстереп, олы тормыш юлына озата.
- Петр Гавриловичның ул-кызлары гади иделәр, беркайчан һаваланмадылар, мактанмадылар. Алар мәктәп директоры балалары кебек тә түгелләр иде,  - диләр классташлары.
    Петр Абрамов мәктәпне җитәкләү белән бергә, Ленин исемендәге колхозның халык контроле группасы рәисе, озак еллар политбюро члены һәм колхоз партия оешмасының идеология бүлеге җитәкчесе кебек гаять җаваплы эшләрне дә башкара.
Шунысы игътибарга лаек, Югары Мәлем мәктәбе коллективы берничә ел элек мәгариф ветераннарына хөрмәтле, игътибарлы. Коллектив башлангычы белән 35 ел мәктәпне җитәкләгән мәгариф отличнигы, сугыш ветераны Петр Абрамовка мемориаль такта ясатылып, ул мәктәп диварына урнаштырылган иде.
   -Әтиебез көчле рухлы, гадел булды. Нинди генә гозер йомыш белэн мөрәҗәгать итсәләр дә ул кешеләргә төпле киңәшләре,  фикерләре белән ярдәм итәргә тырышты, үзен беркайчан өстен куймады.  Без балаларына да, кайда гына эшләсәгез дә кеше булып калыгыз дия иде.  Искә алу кичә оештырган Югары Мәлем мәктәбе укытучылар коллективына зур рәхмәтлебез, -ди кызы Римма.
Беркем дә, бернәрсә дә онытылырга тиеш түгел.