7 нче май көнне 5 А сыйныфында “Ул көннәрнең даны мәңгелек” дигән сыйныфтан тыш чара үтте. Укучылар өчен “Сугыш чоры язучылары” дигән китап күргәзмәсе оештырылды.

Кичә барышында балалар фронтовик язучыларның Бөек Ватан сугышы елларында күрсәткән батырлыклары белән таныштылар. Укучылар М.Җәлил, А.Алиш, Ф.Кәримнең тормыш юлы һәм иҗатына багышланган презентация карадылар. М.Җәлилнең “Кызыл ромашка», “Чишмә” шигырьләрен сәнгатьле укыдылар. А.Алишның “Чукмар белән Тукмар” әкиятен сәхнәләштерделәр. Аудиоязмада Ә.Еникинең “Бала” хикәясенең кыскача эчтәлеген тыңладылар. Укучыларда язучылар иҗатын өйрәнүгә кызыксыну уянды. “Сугышчан язучыларның әсәрләре мәңгелек. Сугыш еллары кайтавазы озак еллар безнең күңелләрдә сакланыр” – дигән сүзләр белән кичә тәмамланды.