4 апрель көнне "Мин татарча сөйләшәм" акциясе кысаларында 6 нчы Б сыйныфында " Син татар телен беләсеңме? исемле викторина уткәрелде. Викторинада  "Зирәкләр" һәм "Тапкырлар"командасы катнашты. Викторина барышында укучылар татар теле буенча белемнәрен күрсәттеләр: тел турында табышмакларга җаваплар эзләделәр, сүзләрдән җөмләләр төзеделәр, шигырьләр сөйләделәр.

4 нче апрель көнне татар теле укытучысы Хәйретдинова Фәридә Салих кызы 3а сыйныфы укучылары белән  “Мин татарча сөйләшәм!” акциясе кысаларында “Туган телем – иркә гөлем” исемле кичә үткәрде. Укытучы балаларга әлеге акция, аның максатлары, татар теленең башка телләр арасында тоткан роле, республикабызда төрле милләтләр арасындагы дуслык, татаулык, үзара аралашу турында сөйләде. Укучылар татар теленә  багышланган  шигырьләр  сөйләделәр,  биеделәр, җырладылар.   Аннан бергәләшеп  табышмаклар, кроссвордлар чиштеләр, мәкальләр әйттеләр.    Өйдә  әти-әниләр  белән,  мәктәптә  иптәшләр белән, урамда,  кибеттә  татарча аралашырга кирәклеге турында сөйләштеләр. Кичә вакытында Фәридә Салих кызы  “Югалган хәрефләр” уены оештырды. Балаларга бу кичә бик ошады. Соңыннан балаларга  логотиплар төшерелгән буклетлар, сүзлекләр таратылды, бергәләшеп фотога төштек. 

4 нче апрель  көнне 2 нче б сыйныфында  (Халиуллина Х.Ә.) “Кем булып эшли?” темасына дәрес узды. Укучылар дәрестә үзләренең әти- әниләренең кайда эшләгәннәре  һәм кем булып эшләүләре турында сөйләделәр. Аннан соң кыскача дәфтәрләренә яздылар. Укучылар бер- берсе белән диалогик сөйләмгә чыктылар. Алар матур һәм дөрес итеп татарча җавапларын бирделәр. Сөйләм барышында укучылар сәнгатьлелеккә дә игътибар бирделәр. Дәрестә уен технологиясе бик урынлы кулланылды. 

Һәр кешенең   үз туган җире, туган йорты, үз туган теле бар.  4  нче Б сыйныфында  2 нче апрель көнне “Сүзләр дөньясында»  дигән чара  үтте. Укучылар  туган телләрендә шигырьләр сөйләделәр, җырлар җырладылар.  Аннан бергәләп “Сүзләр дөньясына”  сәяхәт иттеләр. Сәяхәт вакытында һәр көн кулланырга тиешле тәмле сүзләр турында сөйләштеләр, югалган сүзләрне эзләделәр, бергәләп ребуслар чиштеләр, тел байлыгын арттырдылар. 

19 нчы мартта “Мин татарча сөйләшәм” акциясе кысаларында 6 нчы а сыйныфында “Татарча да яхшы бел” исемле сыйныфтан тыш чара узды. Кичәдә туган тел укытучысы Хәйретдинова Ф.С. акция турында сөйләде. Балаларны үзара  татарча аралашырга, өйдә, урамда, мәктәптә татарча сөйләшергә  өндәде. Укучылар татар теленлә ятлаган шигырьләрен сөйләделәр, татарча уеннар уйнадылар, кроссвордлар чиштеләр. Бу кичәдә балалар туган ягыбызның һәм туган телебезнең байлыгына, иркенлегенә, матурлыгына инандылар. Укучылар туган телне яратуларын күрсәттеләр. Татар милләтен бөеклеккә күтәргән шагыйрьләребез искә алынды. Кичәдә Г.Тукайның шигырьләре сәхнәләштерелде, матур шигырьләр яңгырады. Кичә Г.Тукайның "Туган тел" җырын күмәк җырлау белән тәмамланды.