26нчы апрель – бөек татар шагыйребезнең Габдулла Тукайның туган көне. Бу көнне безнең республикабызда төрле чаралар уза. 2нче урта гомуми мәктәбенең башлангыч сыйныф укучылары “Кыңгырау” балалар бакчасына юл тоттылар. 2Б сыйныф укучылары татар телендә җырлар җырладылар, кечкенә тамашачыны, шигърият күгендә иң якты йолдыз булып янучы, бөек шагыйребезнең иҗаты белән таныштырдылар. Соңыннан “Умырзая” театр түгәрәге коллективы әкият иленә алып кереп китте. Сәхнәдә Абдулла Алишның “Сертотмас үрдәк” әкияте куелды. Җырлы-биюле тамашага балалар кул чабып утырдылар. Соклангыч матур костюмнар, әкият геройларының искиткеч уйнаулары – беркемне дә битараф калдырмады. Яшь артистларга, укытучыларга балалар бакчасы җитәкчеләре, тәрбиячеләре тарафыннан рәхмәт сүзләре әйтелде.