Мәктәп балаларына экологик белем бирүнең төп үзенчәлеге-баланың табигать белән турыдан-туры бәйләнеше, белем бирү учреждениесендә үсеп килүче экологик мохитнең бер өлеше булып торган гөлләр, үсемлекләр белән «тере» аралашуы. Бүлмә гөлләре тере табигатьнең бер өлеше һәм табигать почмакларының даими объектлары, ягъни акыллы, әхлакый, эстетик һәм хезмәт тәрбиясе мәсьәләләрен хәл итә торган дидактик материал булып тора. Үсемлекләр белән аралашканда балаларның табигать дөньясының байлыгы турында күзаллаулары арта. Шуның белән бергә балаларның табигатькә карата кызыксынуы, күзәтүчәнлеге белән бергә сөйләмнәре дә үсә. Бүлмә үсемлекләренә хас формалар, буяулар, исләрнең күптөрлелеге бала хисләренә тәэсир итә, аны аңларга һәм матурлыкны бәяләргә өйрәтә. #”ЭКОЯЗ 2020” республика акциясе кысаларында 2 нче мәктәпнең 1-8 сыйныф укучылары дистанцион белем алу шартларында "Минем яшел фатирым" акциясендә катнаштылар. Балалар видео һәм фотоларында үзләренең бүлмә гөлләре, аларны карап үстерү кагыйдәләре  турында  бер-берсе белән фикерләрен  уртаклаштылар. Мәсәлән, 2 нче Б сыйныфы укучысы Петькин Костя суган утырту серләренә төшендерде.