Мәктәпкәчә яшь ул – баланың көчле үсү һәм камилләшү, беренчел белемнәр алу чоры. Әлеге әһәмиятле чорда бала үзен чолгап алган тирәлекне, тирә-юндәге күренеш һәм предметларны танып белә. Бу чор – баланың шәхес буларак тәрбияләнүенә беренче адымнар салынган җаваплы чор. Балаларның алдагы тормышларында танышачак күп нәрсәләрне уен белән күңелләренә сеңдерү мөмкин. Уен барышында бала төрле һөнәр һәм шөгыльләр турында мәгълүмат ала, кечкенәдән шул эшләргә гадәтләнеп үсә. Уен аша бала җәмгыятьне кабул итәргә өйрәнә, дус-ишләре белән әңгәмә кора, олыларга карата мәрхәмәтле булып үсә. Шуңа күрә без күпчелек вакытыбызны балалар белән урамда уйнарга тырышабыз. Алар комда бик тә яратып уйныйлар, төрле фигуралар ясыйлар. Менә шулай уйнап үтә безнең җәй көннәре.