“Мин татарча сөйләшәм” республика акциясендә 4нче мәктәпнең һәр укучысы актив катнашты. Өлкән сыйныф укучылары бу көнне Яшел Үзән урамнарына чыктылар. Ленин урамы буйлап Җиңү паркына плакатлар, әләмнәр күтәреп, “Мин татарча укыйм”, “Мин татарча уйлыйм”, “Мин татарча җырлыйм”, “Мин татарча өйрәнәм” лозунгларын һәркемгә ишеттереп бардылар, татарча җырлар яңгыраттылар. Әнә шулай итеп, халыкның күңелен кузгаттылар, игътибарын җәлеп иттеләр. Балалар шәһәрдә яшәүчеләр белән әңгәмәгә керделәр, татар теленең әһәмияте турында фикер алыштылар. Фикерләр төрлечә булды. Кемнәрдер балаларны мактап, хуплап, күңелләрен күтәреп җибәрделәр. Бу акциягә сәерсенеп караучылар да булды. Урамдагы кешеләр, үтеп баручы машиналар бу изге ният белән атлаучы балаларга сәлам бирделәр, үзләренең безнең белән фикердәш икәннәрен аңлаттылар. Шунысы куанычла: шәһәребездә татар телен беләләр, өйрәнәләр.