Яшел Үзәндә, шаулап-гөрләп,  “Сөембикә-2011” бәйгесе узды.  Безнең 4нче мәктәптән бу бәйгедә 10нчы сыйныф укучысы Садыйкова Алинә катнашты. Алинә - уку алдынгысы, сәләтле, һәр эштә актив, чибәр, зирәк. 1нче турда Алинә “ Үзем турында үзем” темасына эссе язып, фоторәсемнәрен, шөгыльләре, уңышлары  турында мәгълүмат туплап, портфолио әзерләде. 2нче турда,   Казан ханлыгы ханбикәсе Сөембикә, Казан ханлыгы тарихларын өйрәнеп, тест биремнәрендә тирән белемен күрсәтте. Шулай итеп, Алинә, бәйгенең 2 турын да уңышлы үтеп, финалга чыкты. “Сөембикә-2011” бәйгесенең финалына Алинә тагын да тырышып әзерләнде. Аңа укучылар, укытучылар, китапханәче – һәммәбез теләктәшлек күрсәтеп, җиңүгә рухландырып тордык.

“Сөембикә-2011” бәйгесендә кызлар матур итеп үзләре турында сөйләделәр, кул эшләрен күрсәттеләр, татар халык ашларын тәкъдим иттеләр, җыр-бию белән дә шаккаттырдылар, аларның белемнәрен дә сынадылар. Сәхнәдәге кызлар берсеннән-берсе чибәр, уңган, оста, зирәк иделәр. Алинәбез безнең өчен, әлбәттә, барысыннан да гүзәлрәк, остарак, акыллырак!

Бәйге нәтиҗәләре буенча Алинә “Иң уңган туташ” номинациясендә бүләкләнде. Без, 4нче мәктәп укучылары, Алинәне чын күңелдән бу зур җиңүе белән тәбрик итәбез. Алинәгә уңышлар, бәхет телибез!!!