Муса Җәлил - ялкынлы шигырьләр авторы, Ватаныбыз азатлыгы өчен көрәшкән кыю солдат ул. Патриот шагыйрь фашист тоткынлыгына эләгеп тә, рухи ныклыгын югалтмый, курку белмичә дошманга каршы көрәш алып бара.
   Әлеге иртә балаларда бөек шагыйребез белән горурлану хисе уяту, аның иҗаты турында яшь  буынны мәгълүматлы итү,  туган илгә карата мәхәббәт тәрбияләү максатында оештырылды.
Җәлил иҗат иткән шигырьләрне, аңа атап язган җырларны балалар чын күңелдән  илһамланып башкардылар. Шагыйрьнең “Кызыл ромашка”, “Яшь ана” кебек җанга үтеп керә торган  шигырьләрен сөйләделәр. Балалар хәтта шагыйрь кечкенә  вакытта яратып уйнаган “Чума үрдәк, чума каз” уенын да уйнадылар. Әлеге кичә кысаларында әти-әниләр белән бергә  Җәлил шигырьләренә ясалган рәсемнәр күргәзмәсе дә оештырылган иде.
Сугыш  чорында күпме авырлыклар күрүенә карамастан, Муса Җәлилнең күңел төшенкелегенә бирелмәве, үз Ватанының герой улы булуы, концлагерьда вакытта авыр шартларда мәңге үлмәс, мәгънәле шигырьләр язуы экранда чагылдырылган сурәтләр аша тасвирланды.
Җәлилнең тормышы җырга тиң. Җыр үлемсез булган кебек, аның шигырьләре, исеме дә үлемсез.Аның шигырьләре хәзерге яшь буынга тирән белем һәм тәрбия бирә, балаларыбызның Җәлил кебек курку белмәс, үз Ватанына тугры булган уллар һәм кызлар булып үсүендә зур роль уйный, татар булуыбыз белән горурланырга өйрәтә. Бәйрәмебез балалар башкаруында “Бөек шагыйрь Муса Җәлил” җыры  һәм "Кызыл ромашка" шигырен сәхнәләштеру белән тәмамланды.