2014 елның 21 февралендә мәктәбебездә “Халыкара туган телләр көне”нә багышланган әдәби-музыкаль кичә булып үтте. Аны мәктәбебезнең татар теле һәм әдәбияты укытучылары методик берләшмәсе оештырды. Остазлар үзләренең укучыларын тырышып әзерләделәр. 4 сыйныф укучысы Рамазан Минһаҗев (укытучысы Р.И.Амурова), 5сыйныф укучысы Илсур Фәйзерахманов (укытучысы Г.Ф.Исмәгыйлева), 6сыйныф укучылары Гадилә Шамилова һәм Айгөл Гыйниятуллина (укытучысы Н.Р.Мингалиев), Ләйсән Вәлишина (укытучысы Л.Р.Гаптрахманова) аеруча яхшы чыгыш ясадылар. 1сыйныф укучысы Суфия Таһированың һәм 7 сыйныф укучысы Ивилина Вәлиеваның пианинода, 5 сыйныф укучысы Илдус Хәсәновның балалайкада, 7сыйныф укучысы Гадилә Рафыйкованың скрипкада халкыбызның көйләрен уйнавы тамашачыларны җанландырып, дәртләндереп җибәрде. Әдәби-музыкаль кичәне татар теле һәм әдәбияты укытучысы Нияз Рәхимҗан улы Мингалиев алып барды. Ул үзе төзегән башваткычларны укучылардан чиштерде, татар теле турында берничә презентация күрсәтте, туган телебезнең тарихы, аның халыкара тоткан урыны турында тәфсилләп сөйләде. Укучыларны тантанага яхшы итеп әзерләгәне өчен музыка мәктәбе җитәкчесе Наилә Хөсәен кызына зур рәхмәт. Татар теле һәм әдәбияты укытучылары Г.Ф.Исмәгыйлевага, Р.И.Амуровага, Л.Р.Гаптрахмановага, Н.Р.Мингалиевкә халыкара бәйрәмне әзерләүдә күп көч куйганнары өчен аеруча мактау сүзләре әйтергә кирәк. Мөгаллимнәрнең мактаулы, авыр эшләрендә һәрчак уңышлар юлдаш булсын! Сабырлык, корычтай нык сәламәтлек телик аларга!