“Яздан аерып булмый Тукайны!” – дип шагыйрь Р. Фәйзуллин юкка гына язмагандыр. Һәр язда Татарстаныбызда, Россиянең төрле төбәкләрендә, хәтта чит илләрдә дә сөекле Тукаебызның туган көнен билгеләп үтәләр...

     Татар халкының бөек шагыйре Габдулла Тукайның тууына быел 125 ел тулды. Шушы истәлекле көнгә мәктәбебезнең укытучылары да, укучылары да ныклап әзерләнделәр. Сөекле шагыйребезгә багышланган газеталар чыгардылар, рефератлар яздылар, аның әсәрләре буенча рәсемнәр ясадылар, Республикабызда һәм районыбызда үткәрелгән төрле конкурсларда катнашып, алдынгы урыннарны да алдылар...

     Ниһаять, 26 апрель көнне мәктәбебездә Г. Тукайга багышланган әдәби-музыкаль фестиваль уздырылды. Башлангыч сыйныф укучыларының сәхнәләштерелгән “Шүрәле”се, 4 сыйныф укучысы И. Гайнановның “Су анасы” әсәрен сәнгатьле итеп сөйләве, 5-6 сыйныф укучыларының чыгышлары тамашачыларга бик ошады.

     6 сыйныф укучылары Б.Низамиевның баянда “Туган тел”не уйнавын, И.Ногмановның балалайкада халык көйләрен башкаруын зур кызыксыну белән тыңладылар. 7 сыйныф укучылары М.Домрачева һәм А. Яшинаның Г. Тукай шигыренә язылган “Бишек җыры”н, 10 сыйныф укучысы С. Абрамованың “Пар ат”ны җырлавы залны алкышларга күмде. Фестивальне 8Б сыйныфы укучысы Р. Госманов һәм 11 сыйныф укучысы Г. Вәлиева алып барды. Шундый яхшы фестиваль әзерләгән өчен укучыларга, укытучыларга һәм мәктәп җитәкчеләренә зур рәхмәт әйтәсе килә...