Бөек шагыйребезнең юбилее якынлашкан көннәрдә Татарстан Республикасында һәм чит төбәкләрдә аңа багышланган Тукай укулары дәвам итә. Шуларның берсе 2011 елның 22 апрелендә Казан шәһәрендәге Габдулла Тукайның әдәби музеенда булып үтте. Сөекле шагыйребез Габдулла Тукайның тууына 125 ел тулуга багышланган быелгы укулар “Габдулла Тукай һәм Иске Татар бистәсе” дип аталды. Анда КФУ профессоры, филология фәннәре докторы, Г.Тукай җәмгыяте рәисе Хатыйп Йосыф улы Миңнегулов, КФУ профессоры, филология фәннәре докторы, Резеда Кадыйр кызы Ганиева, ТР Фәннәр Академиясенең Ш.Мәрҗани исемендәге Тарих институтының өлкән фәнни хезмәткәрләре, тарих фәннәре кандидатлары Рәшит Габделфәрт улы Галләмов, Тәэминә Әхмәт кызы Биктимирова, ТР Милли музее генераль директоры, тарих фәннәре докторы, Гөлчәчәк Рәхимҗан кызы Нәҗипова һ.б. чыгыш ясады.

     Тантаналы кичәнең икенче өлешендә Татарстан Республикасы мәктәпләреннән килгән, Тукай укуларында катнашып призлы урыннар алган укучылар үзләре әзерләгән темалар буенча кунаклар алдында чыгыш ясадылар. Алар арасында мәктәбебезнең 9 сыйныф укучысы, Яшел Үзән муниципаль районында узган Тукай укулары дипломанты, “Каурый каләм” бәйгесе җиңүчеләренең берсе Эмиль Радик улы Галиуллин (укытучысы Нияз Рәхимҗан улы Мингалиев) да бар иде. Эмиль чыгышыннан соң КФУ профессоры Хатыйп Йосыф улы Миңнегулов аңа мактау сүзләре әйтте...

     Галиуллин Эмильгә исәнлек-саулык, иҗади уңышлар телибез! Афәрин, Эмиль!!!