Гаилә традицияләре – буыннан-буынга сакланып килүче аерым бер гаилә эчендә барлыкка килгән билгеле бер тәртип, үз-үзеңне тоту әдәбе, гореф-гадәтләр һәм күзаллаулар ул.  Берәүләр өчен ул кичләрен бергәләшеп китап уку булса, икенчеләре өчен өстәл уеннары уйнау, өченчеләргә – гаилә белән спорт ярышларында катнашу. Һичшиксез, һәр гаиләдә үзенә генә хас традицияләр була. Алар гаилә әгъзаларын берләштерә, туганлык хисләрен арттыра, бер-береңә якынаю чарасы булып тора, рухи үсешкә, үз-үзеңне аңларга, тормышта үз юлыңны табырга ярдәм итә. Гаилә елы, татар теле атналыгы  кысаларында  9-11  сыйныф укучылары белән  “Гаиләмнең күркәм гореф- гадәтләре” дип исемләнгән чара уздырылды. Укучылар гаиләләрендә сакланып килүче матур гореф-гадәтләре, гаилә истәлекләре белән таныштырдылар.Чараның төп максаты- укучыларда гаилә кыйммәтләренә аңлы караш, гаиләдә үзара хөрмәт, әти-әни, әби-бабай, туганнарга карата олы ихтирам, мәхәббәт хисләре тәрбияләү, хатын-кызның гаиләдә тоткан ролен билгеләү иде.