16 ноябрь - Халыкара толерантлык көне. Шул уңайдан гимназиябездә 16нчы ноябрьдән башлап 23нче ноябрьгә кадәр Толерантлык декадасы игълан ителде. Декаданың максаты – позитив гражданлык бердәмлеге, актив социаль позиция формалаштыру, үзара аңлашу осталыгы булдыру. 

16нчы ноябрь көнне тематик линейкалар узды: укучылар бу көннең тарихына кайтып, 1995нче елда узган ЮНЕСКО 28нче Генераль конференциясендә кабул ителгән "Чыдамлык принципларының декларациясе" белән таныштылар, Россия Федерациясендә Толерантлык көне 2006нчы елдан башлап билгеләнә икәнен белделәр. 

Бүген, 20нче ноябрь көнне, гимназиянең барлык сыйныфларында "Толерантлык дәресе" узды. Дәресләрдә укучылар Россия территориясендә яшәүче халыкларның мәдәни мирасы белән танышып, төрле милләт вәкилләре белән дустанә мөнәсәбәтләрне үстерүгә шәхси өлеш кертүнең мөһимлеге турында фикер алыштылар. Өлкән сыйныфларда дәресләр, иң беренче чиратта, мәдәниара диалог кору закончалыкларын аңлауга юнәлтелде. Кече сыйныф укучылары исә, “тынычлык” сүзен дөньяның 86 телендә, үз исемнәрен фарсы телендә язып карадылар, рус, татар, башкорт, удмурт, яһүд, дагстан халык мәкальләре белән таныша алдылар.