"Мин татарча сөйләшәм" республика акциясе - һәр ел Татарстанда һәм татар дөньясында уздырыла торган акция. Ул гына да түгел, быел бу акциягә 10 ел тула. Гадәттәгечә, төп чаралар апрель аенда уза һәм быел безнең гимназия укучылары бар көчләрен куеп, бу акциядә актив катнашты. Иң элек, ВКонтакте челтәренә без барлык тематик чараларны урнаштырдык: акцияне котлап төшерелгән видеолар, шәһәрдә табылган хаталарның фотосурәтләре, “Мин татарча сөйләшәм” дип исемләнгән флешмоб, шәһәр халкыннан алынган сорау нәтиҗәләре. Шушы чаралар оештырылганнан соң, гимназиябезнең “Варислар” командасы 19 апрель көнне “Татар дозор” уенына юнәлде.

«Татар дозор» уенында барлыгы 14 команда катнашты. Бауман урамында җыелып, уенның кагыйдәләре белән танышканнан соң, без, беренче биремне чишеп, маршрутыбызны башлап  җибәрдек. Дистәдән артык ноктадагы биремнәрне чишү дәверендә, без Камал театры алдында Хуҗа Насретдин, Болак буенда «Итил» кебек персонажлар белән очраштык, алардан биремнәр алып, татар халкының тарихын барладык, Казанның сәүдә үзәкләрендә, урамнарында, даруханә, кибетләрендә дәүләт телләре - татар һәм рус телләренең тигез дәрәҗәдә кулланылышын тикшердек, һәм, әлбәттә, биремнәрне үтәгән вакытта бар эшләребезне фото һәм видеога төшереп бардык.

Акциянең нәтиҗәләре 26 апрель көнне Бауман урамында игълан ителәчәк.