27 апрель көнне Байлар Сабасында Республиканың «Әйдә ШаяРТ!» татар КВН лигасының зональ этабы узды. «Әйдә ШаяРТ!» – татар телендә үткәрелә торган заманча телевизион юмористик уен. Лиганың максатлары – яшьләрдә милли үзаң, үз халкының мәдәни һәм тарихи мирасына хөрмәт, туган телгә мәхәббәт тәрбияләү, сәләтле яшьләрне ачыклау һәм аның иҗади потенциалын тормышка ашыру өчен шартлар тудыру, татар телендә юмор үстерү. «Әйдә, ШаяРТ» КВН лигасы берничә этаптан уза. Фестиваль, чирекфинал, ярымфинал – бу этапларда югары баллар җыеп, финалга узу мөмкинлеге бар. Башта республиканың төрле районнарында командаларны сайлап алу этаплары – зональ этаплар уза. Шул зональ этапта югары баллар җыеп, беренче урын алган гимназиянең "Теге ни" командасы «Чирек финал»га узды! Гимназиядә татарча КВН командасын җитәкләгән Әмир белән Маратка уңышлар теләп калабыз! Афәрин, егетләр!