2А һәм 2В сыйныфы укучылары (сыйныф җитәкчеләре Юсупова З.Р., Мубаракшина Л.Г.) 15 нче сентябрь көнне әти-әниләр белән берлектә Казан федераль университетының планетариенда булдылар.

       Казан федераль университетының планетариенда махсус җиһазлар ярдәмендә Кояшны карау белән генә чикләнмичә, башка галактикаларга да күз салырга була. Планетарийның гөмбәзле түшәме булган атаклы «Йолдызлар залы» җир шарының теләсә кайсы почмагына, аның үткәне, бүгенгесе, киләчәгенә илтә ала, кояш һәм ай тотылуын күрсәтә, йолдызлы күкне Җиһанның төрле ноктасыннан күзәтергә, Киек каз юлында Кояшның, башка планета һәм системалар янәшәсендә безнең галактиканың урынын күз алдына китерергә ярдәм итә. Планетарий территориясендә интерактив музей эшли. Обсерватория манарасында тирән космосны күзәтер өчен, кояш системасын өйрәнү өчен махсус берничә телескоп һәм ике кояш телескобы бар. Холлда интерактив экскурсия узды. Обсерватория янындагы территория гүзәллеге ягыннан табигый тыюлыкны хәтерләтә. Балаларның әйләнә-тирә якны тирәнтен өйрәнү максатыннан оештырылган экскурсия балаларга һәм әти-әниләргә бик ошады.