Шушы көннәрдә гимназиянең 8а сыйныфы укучылары "Тамчы-шоу" интеллектуаль уен-бәйгесендә катнашты. Бары тик гүзәл затлардан гына торган "Сылу кызлар" командасы (Вәлиева Азалия, Галимова Айзилә, Сабирҗанова Энҗе, укытучылары Гөлфия Рамил кызы Гыйләҗева белән берлектә) әлеге уендагы көндәшләре 149нчы лицей командасы белән көч сынаштылар. Уен "Казан урамнары"  темасына багышланды, ягъни катнашучыларга мәркәзебез урамнары тарихын, бүгенгесен, нигез салучыларын, истәлекле вакыйгаларын яхшы белергә кирәк иде. Өстәвенә катнашучыларның грамоталылыгы һәм төрле фән белемнәре тикшерелде. Бәйге 3 турдан гыйбәрәт иде. Һәр тур өчен җаваплы кеше билгеләнде, димәк һәр катнашучы үз командасына күпмедер балл алып килергә мөмкин иде. Нәтиҗәдә "Сылу кызларыбыз" 30/20 балл белән көндәшләрен уздырып, беренчелекне яуладылар. Без аларны чын күңелдән тәбрик итәбез! Укучыларыбыз белән төшерелгән тапшыру язмасын 6 октябрь көнне ТНВ каналында карарга чакырабыз.