26 нчы сентябрь көнне булып узган семинарда, бик эчтәлекле, бай, безнең традицион Әдәби мәйданчык та үткәрелде. Әлбәтта, әлеге Әдәби мәйданчык ниндидер чараларда гына оештырылмый, ул һәрдаим, һәр озын тәнәфестә үткәрелә. Ул һәр баланың күңелендә үз-үзеңә ныклап ышану, тәвәккәл булу, үз талантыңны ачарга мөмкинчелек бирү максатыннан оештырыла.

Әдәби мәйданчыкны гимназиянең татар теле һәм әдәбияты укытучылары Нәҗипова Эльвина Рифатовна, Ахметова Гүзәл Харисовна һәм педагог-оештыручы Петрова Гөлчәчәк Ильинична әзерләде. 1 нче сыйныфтан алып 9 нчы сыйныфка кадәр булган укучылар, үзләренең нәфис сүз, җыр-бию юнәлешендәге талантларын тәкъдим итте. Татар телендә шундый матур итеп шигырьләр сөйләделәр, җырлар җырладылар. Шунысы игътибарга лаек: укучыларыбыз татар халык җырларына ныграк игътибарлы. Шагыйрьләрдән, Г.Тукай, Э.Мөэминова, Ш.Маннур, З.Ярмәки, Р.Вәлиевларга өстенлек биргәннәр. Әлбәтта, бу укучыларның тырышлыгыннан бигрәк, хөрмәтле укытучыларның да зур хезмәте! Алар һәрдаим укучыларны бар яктан әзерләп, барлап торалар. Гимназиянең уңышлары да, әлеге укытучыларның тырыш хезмәтеннән. “Ләйсән” вокаль ансамбле белән “Алтын” бию ансамбле дә кунакларны үз чыгышлары белән сөендерде. Семинарда катнашучы һәр укытучы, безнең гимназиянең бер зур комплекс булуын ассызыклады. Без уку-укыту юнәлешендә генә түгел, ә иҗат өлкәсендә дә зур мактауга лаек булуыбыз белән тагын бер кат горурландык!