26 нчы  сентябрь көнне гимназиядә югары квалификацияле татар теле укытучыларының "Татар теле һәм әдәбият дәресләрендә олимпиада хәрәкәтен оештыру" дигән темага Республика семинары булды. Семинарның җитәкчесе – филология фәннәре кандидаты, КФУ доценты М.М.Шәкүрова.

          Семинар директорыбыз Л.Г.Хөснетдинованың гимназия эшчәнлеге, сәләтле балалар белән эшне оештыру үзенчәлекләре турындагы эчтәлекле чыгыш–презентациясе белән башланып китте. Тарих укытучысы Ф.Р.Фәхретдинова музей буйлап сәяхәт оештырды, ә укучылар үзләре яратып катнаша торган инновацион проектлар хакында тирән эчтәлекле чыгыш ясадылар. Татар теле һәм әдәбияты укытучылары Г.Р.Гыйләҗева, Г.В.Нурмиева, Н.А.Абдульмановалар тарафыннан искиткеч матур, яңа технологияләр белән баетылган дәресләр, мастер-класслар күрсәтелде. Э.Р.Нәҗипова, Г.И.Петрова, Г.Х.Әхмәтовалар тарафыннан оештырылган  "Әдәби мәйданчык" шулай ук килгән кунакларның күңеленә хуш килде. Семинар азагында, килгән кунаклар, гимназиябездә эшләп килүче төрле түгәрәкләр эше белән таныштылар.

          Семинарда катнашучы коллегаларыбыз гимназиядә күргәннәреннән бик канәгать калуларын белдерделәр: "Сезгә килеп без үзебез өчен бик күп нәрсә алдык, укучыларыгыз бик активлар, укытучыларыгыз һөнәри яктан көчлеләр һәм затлылар ",– дип зур рәхмәтләрен җиткерделәр.