Герой-шагыйрь Муса Җәлилнең тууына 120 ел тулуга чараларның дүртенче көнендә “Шагыйрьнең исеме үлемсез” дип аталган зур әдәби-музыкаль кичә үтте. Чарага кунак булып, Татарстанның атказанган сәнгать эшлеклесе, Ш.Маннур, А.Алиш, Ф.Хөсни премияләре лауреаты язучы, шагыйрь Рафис Корбан кайтты; шулай ук Мәмдәл авыл җирлеге башлыгы Фәрит Сафиуллин; Татарстанның атказанган мәдәният хезмәткәре, Биектау районының мактаулы гражданины, Биектау районы “Ак калфак” татар хатын-кызлары оешмасы җитәкчесе Гөлсинә Шакирова; Мәмдәл мәдәният йорты җитәкчесе Гөлгенә Сираҗиева, мәдәният йорты аккомпаниаторы, Ф.Туишев  исемендәге гармунчылар бәйгесе лауреаты Радик Зарипов, укучылар һәм укытучылар катнашты.
Кичәне мәктәпнең яшь армиячеләре Муса Җәлилгә багышланган шигырьләр, җырлар белән башлап җибәрделәр. Татар теле һәм әдәбияты укытучылары Л.И.Җамалиева һәм В.Р.Сафиуллина Р.Корбанның “Ватан” романына нигезләнеп төзелгән программа буенча алып бардылар. Укучылар әсәрдән өзек укыдылар, М.Җәлилнең шигырьләрен сөйләделәр. М.Җәлил сүзләренә иҗат ителгән “Сагыну”, “Җырларым” җырлары, бию башкарылды. “Ватан” романының язылу тарихы турындагы истәлекләр белән Р.Корбан уртаклашты. Килгән кунаклар да матур шигырьләр укып, җырларын башкарып, искә алу кичәсен ямьләндереп җибәрделәр.
Укучыларга патриотик тәрбия бирү, бөек шәхесләр турында күбрәк белү, туган телгә, аның әдәбиятына мәхәббәт тәрбияләүдә мондый чараларның әһәмияте зур.
Яшә шулай бөек Муса булып,
Үрнәк булып килер буынга.
Җырың маяк булсын балаларга,
Моңың юлдаш булсын халкыңа!