“Татарстан варислары берлеге” оешуга 30 ел
1990 елның 15 сентябреннән республикабызда “Татарстан варислары берлеге” балалар оешмасы барлыкка килә. Шул көннән башлап барлык мәктәпләрдә бу дата Татарстан варислары берлегенең туган көне буларак билгеләп үтелә. Быел исә, әлеге оешманың барлыкка килүенә 30 ел. Республикада балалар хәрәкәтләре шактый, әмма "Татарстан варислары" – ул иң зур оешмаларның берсе. Гомумән, ул Русиядә дә иң зур оешма булып санала.
Бүген, ягъни 15 нче сентябрь көнне, Теләче районының барлык мәктәпләрендә дә әлеге истәлекле дата уңаеннан, тантаналы рәвештә, 2 нче сыйныф укучыларын “Эзтабарлар”, ә 5 нче сыйныфларны “Варислар” сафына кабул иттеләр.
Сауш төп мәктәбендә дә әлеге чара бик матур итеп оештырылды.
Бәйрәмнең дәвамы итеп, укучылар педагог-оештыручы Рахматуллина Н.В. белән берлектә, төштән соң табигатькә сәяхәт кылырга булдылар. Дәресләрдән соң, балалар рюкзакларын алып, юлга кузгалдылар. Көн дә матур, кояшлы иде. Көзге табигатьнең матурлыгына сокланып, челтерәп аккан чишмә тавышын тыңлап, җилне колачлап, рәхәтләнеп уйнап, тәмлүшкәләр ашап, көнне кызыклы һәм файдалы итеп үткәреп, барыннан да канәгать булып, кич белән укучылар өйләренә таралыштылар.