Өлкән кешеләр – безнең әти-әниләребез, әби-бабайларыбыз. Алар бик күп авырлыклар күргән, дөньяның ачысын-төчесен  татыган кешеләр. Аларны өлкән булган өчен генә түгел, ә әти-әниләребез, әби-бабайларыбыз булган өчен дә хөрмәт итәргә тиешбез.  Гомерләре буе хезмәттә кайнаган, сугыш  һәм сугыштан соңгы авырлыкларны иңнәрендә күтәргән, колхоз нужасын беренче көннәреннән үк тәртәгә җигелеп тарткан әби-бабаларыбыз картлык көннәрендә зур игътибарга, хөрмәткә лаек.

     Шул уңайдан,  1 октябрь көнне  безнең мәктәбебездә дә Өлкәннәр көне  билгеләп үтелде. Әлеге бәйрәм  Олы Мәтәскә авылы җирлеге белән берлектә мәдәният йортында оештырылды. Хөрмәткә лаеклы өлкәннәребезне бәйрәмнәре белән Олы Мәтәскә авыл җирлеге башлыгы Валиуллин М.А., Олы Мәтәскә урта мәктәбе директоры Сөнгатуллин М.М., Олы Мәтәскә авыл җирлегенең ветераннар советы рәисе Нигматзянова Ә.Н. котлады. Укучыларыбыз көче белән әзерләнгән концерт программасын өлкәннәребез аеруча яратып кабул итте. Бәйрәм чәй табыны янында тәмамланды, соңыннан өлкәннәргә күчтәнәч-бүләкләр тапшырылды.

     Моннан тыш, 30 сентябрь көнне барлык классларда да Өлкәннәр көненә багышланган тәрбия сәгатьләре уздырылды. Ветерен укытучылар  һәм техник хезмәткәрләргә укучыларыбыз котлау открыткалары өләштеләр. Яшь тимурчыларыбыз караучысыз калган өлкән буын кешеләренә ярдәм иттеләр.