25 нче май көнне Саба муниципаль районы Лесхоз бистәсендә районара мәктәп урманчылыклары слеты узды. Анда 25 берләшмәдән 87 кеше катнашты.

Катнашучылар «Ботаника һәм дендрология», «Урманнарны торгызу һәм үстерү», «Урманнарны саклау һәм яклау», «Геодезия», «Таксация», «Урман хуҗалыгында машиналар һәм механизмнар», «Урман янгыннарын сүндерү» юнәлешләре буенча практик биремнәр  үтәделәр. Укучылар Татарстан Республикасында үсә торган агачлар һәм куаклар, урман хуҗалыгында кулланыла торган техника, үсентеләрне утырту ысуллары һәм технологияләре, шулай ук командада эшләү, урманда ориентлашу, каршылыкларны җиңеп чыгу, урман янгыннарын сүндерү һәм таксацияләү күнекмәләрен күрсәттеләр.

 Конкурс нәтиҗәләре буенча Фатих Хөсни исемендәге Олы Мәтәскә урта мәктәбенең “Урманкай”  мәктәп урманчылыгында тәрбияләнүче балалар (Сабирзянова Айзилә, Сагдиева Чулпан) III урын  яуладылар. “Урманкай”  мәктәп урманчылыгы җитәкчесе – Сабирзянов Илнур Илдар улы.Котлыйбыз, алга таба да уңышлар телибез!

 Ябылу тантанасында җиңүчеләрне һәм катнашучыларны ТР урман хуҗалыгы министрының беренче урынбасары Илгизәр Зарипов, Саба муниципаль районы башлыгы Рәис Миңнеханов, «Рослесинфорг» федераль дәүләт бюджет учреждениесенең Казан филиалы директоры Айрат Йосыпов, Казан дәүләт аграр университеты ректоры Айрат Вәлиев һ.б. котладылар.