Яз килү белән безнең канатлы дусларыбыз да үз туган якларын сагынып, үз туган җирләренә кайтырга ашкыналар. Без дә аларны бик сагынып көтеп алабыз. Сыерчыклар аеруча безнең ярдәмгә мохтаҗ кошлар. Безнең Борды урта мәктәбе укучылары, яз хәбәрчеләребез өчен, сыерчык ояларын, һәр елдагыча, кышның соңгы көннәреннән үк ясарга керешә. Быел да бу конкурста үзләрен сынатмадылар, бигрәк тә башлангыч класс укучылары. Алар ясаган ояларны күреп, сыерчыкларыбыз бик тә шатланырлар һәм моңлы тавышлары белән безнең күңелләребезне күтәрерләр дип ышанабыз. Укучыларыбызның активлыгы, туган җиребезгә битараф булмаганлыклары, күпмедер дәрәҗәдә,шушы кош ояларының саныннан тора да инде.