Балалар бәйрәме

Мәктәпләрдә укулар тәмамланган, җәй башланган, ял лагере эшли башлаган , Сабантуйлар гөрләгән вакыт. Менә шундый күӊелле вакыйгалар белән башланып китә балаларныӊ  җәйге ялы.

1 июнь – Халыкара балаларны яклау көне Боерган төп мәктәбендә  зур бәйрәм итеп үткәрелде. Иӊ элек укытучы  Гыйләҗева Г.Ә. балаларны бәйрәм белән котлады,  уку елы дәвамында фән олимпиадаларында, иҗади конкурсларда, спорт ярышларында катнашып җиӊү яулаган балаларныӊ исемнәрен атады. Аннары чын бәйрәм башланды: сабантуй гөрләде. Балалар үзләренеӊ көчләрен Сабантуйныӊ традицион уеннарында сынадылар:  йөгереш, капчык киеп йөгерү, чүлмәк вату, капчык сугышы, күз бәйләп чүлмәк вату, кашыкка йомырка куеп йөртү, кашык белән су ташу, «атлар» чабышы. Уеннар җыр, биюләр белән үрелеп барды.  Бүләкләр дә мулдан иде, балалар күӊеленә хуш килде.

            Форсаттан файдаланып, балаларны бүләкләре белән сөендерүче даими иганәчеләребезгә рәхмәт сүзләрен җиткерәбез. Менә алар: Арсланов Айрат, Әхмәтҗанова Рәсимә, Габдуллина Земфира, Галиева Гөлсинә, Фәттахова Людмила, Шәйхуллина Илгизә. Аларга саулык-сәламәтлек, эшләренеӊ гөрләп баруын, гаилә иминлеге телибез.

Дөньялар имин, балаларыбыз шат булсын!