Тәтеш кадет-интернат мәктәбендә “Туган телем-иркә гөлем” дип аталган бик күркәм бәйрәм булып узды. Аңа әзерлекне кадетлар, ата-аналар һәм укытучылар бергәләп алып бардылар. Бәйрәмгә районыбызда дус-тату яшәп килгән дүрт төп милләт вәкилләренә багышланган күргәзмә оештырылды. Анда халык иҗаты һәм декоратив-гамәли сәнгать эшләнмәләре, кадетларның үз куллары белән әзерләнгән эшләре урын алды.

Бәйрәмне Н.Р.Сиякина оештырды. Мәктәпнең туган тел һәм әдәбияты укытучысы булып 16 ел эшләүче Нәфисә Равил кызы бәйрәмне “Туган тел” җыры белән башлап җибәрде. Милли чара дәүләт телләрендә алып барылды. Кадетлар 6 милләт вәкилләре костюмнарыннан үз туган телләрендә чыгыш ясадылар. Күңелле җырлар, матур шигырьләр бер-берсен алыштырып тордылар. Укучыларга бәйрәм бик ошады, онытылмас хисләр калдырды.

Чара ахырында бәйрәм чәе оештырылды.