5 августта халыкара  светофор туган көн. Моннан 101 ел элек  АКШ ның Кливленд шәһәрендә  юл йөрүне көйләүче прибор урнаштырыла.  Ә Россиядә исә беренче светофор 1930 нчы  елда Ленинградта барлыкка килә.

    Бүген  әлеге датаны  “Йомры икмәк” балалар бакчасында да билгеләп үттек. Нәниләребез юл йөрү кагыйдәләрен тагын бер тапкыр ныгытты. Һәр группада әлеге темага карата әңгәмәләр үткәрелде. Балалар исә юл хәрәкәтен сурәтләгән рәсемнәр ясады, табышмакларга җаваплар таптылар.  Юл йөрү билгеләре һәм юллар төшерелгән махсус келәм өстендә  машина йөртүче һөнәрен үзләштерү аларга аеруча ошады. Кызыл җеп булып әлеге тема кичкә кадәр сузылды. Белемнәрне ныгыту  урамдагы  мәйданчыкта  “Җәяүлеләр һәм машиналар”  рольле-сюжетлы уены белән дәвам итте. Нәниләр машина йөртүчеләргә дә, җәяүлеләргә дә, хәтта, нәни инспекторларга да әверелделәр.  Кызыксынып уйнаган арада  балалар  үзләре дә сизми юл йөрү кагыйдәләрен ныгытып үзләштерделәр.