Тукайның тормыш баскычлары

Мәшһүр шагыйребез Габдулла Тукайның  тормыш юлын тирәнрәк өйрәнү максатыннан бакчабызда үзенчәлекле чара узды.  ... Әнә өстәл янында  лампа яктысында  балачак хатирәләренә чумган зур Тукай утыра. Ул  кыска һәм шанлы гомеренең истәлекләрен барлый. Шул рәвешле әйләнә-тирәдәгеләрне дә үзенең тормыш баскычлары  буйлап алып китә.  Сәхнәдә  бер-бер артлы балалар һәм педагоглар  катнашында әзерләнгән күренешләр:  кечкенә Апушның Шәрифә карчык  өе ишеге төбендә керә алмый торуы, печән базарында ямщикның “Асрарга бала бирәм, кем ала?” дигән сүзләре, Кырлайдагы  балачагы һәм, ниһаять, ятим Тукайның Җаекка китүе. Һәр эпизод  шагыйрьнең  әсәрләре белән үрелеп барды.  Балалар зур осталык белән “Эш беткәч уйнарга ярый”, “Кәҗә белән сарык”, “Бала белән күбәләк”, “ Кызыклы шәкерт” шигырьләрен һәм әкиятләрен җанландырды.  Тамаша барышында залдагы тынлык,   балаларның кызыксыну катыш гаҗәпләнү чагылган күзләре чараның үтемле, уңышлы узуы турында сөйли.