Кош канатсыз, кеше талантсыз булмый. Әлеге сүзләр Кәрим Тинчурин исемендәге  Татар дәүләт  драма  һәм комедия театры  бинасында узган  “Сәйяр”  республика театр фестиваленең йомгаклау этабында еш яңгырады.    Катнашучылар бу сүзләрнең дөреслеген чын мәгънәсендә дәлилләде.  167 нче балалар бакчасы да әлеге фестивальдә катнашкан өчен  Диплом  белән бүләкләнде.  Бакчаның театр коллективы  конкурска  Абдулла Алишның “Сертотмас үрдәк” әкиятен һәм “Бияләй” рус халык әкиятен тәкъдим иткән иде.   Нәни артистларның талантына таң калып  утырам, дип  соклануын яшермәде Дәүләт Советы депутаты, язучы, шагыйрь Разил Вәлиев. Фән һәм мәгариф миистры Энгель Фәттаховның  “Иң беренче чиратта, зур рәхмәтемне  тәрбиячеләрем һәм укытучыларыма җиткерәм. Бүген сәхнәдә балкыган йолдызчыклар аларның тырышлыгы”, - дигән сүзләре педагоглар йөрәгенә сары май булып ятты. Балалар һәм яшүсмерләрнең  талантын ачуга, театр сәнгатенә тартуга юнәлдерелгән  “Сәйяр” конкурсының йомгаклау өлеше  зур әзерлек белән колачлы узды.  Моны педагоглар фидакарь хезмәтләренә  югары бәя дип кабул итте. Катнашучылар әлеге чарадан  киләчәктә дә мондый чараларда көч сынашу  теләге белән янып, канатланып кайтып китте.