29 нчы май көнне “Йомры икмәк” балалар бакчасында узган чыгарылыш кичәсе балалар, педагоглар, ата-аналар күңелендә матур мизгелләр калдырды. Быел бездән 24 бала олы тормыш юлына атлады.

      Балаларның бәйрәмдә театральләштерелгән тамаша геройлары белән берлектә рус, татар телләрендә шигырьләр сөйләве, җырлавы, килешле итеп вальс әйләнүләре дә һәркемнең күңеленә хуш килде. Бәйрәм сценарийсы да бик уңышлы, кызыклы иде. Уңган, зирәк, акыллы балалар  Буратиноны белем иленә сәяхәткә алып киттеләр. Тукталышларда «Сүзләр төзе», «Буталчык саннар» кебек уеннарда катнашып, беренче имтихан тоттылар. Ә бу исә аларның бакчада ныклы хәзерлек алуларын тагын бер кат күрсәтте.

     Махсус әзерләнгән видеорәт күпләрне тәэсирләндерде. Биредә балаларның нәни  һәм хәзерге чаклары чагыштырып бирелде.  Сабыйлардагы үзгәрешләр  балалар бакчасында узган елларның ни кадәр җаваплы дәвер булуына сүзсез дәлил иде.  Бу уйларны тагын да куәтләп, абый-апаларын котларга бәйрәмгә нәниләр төркеме дә керде.

     Сөенечле, моңсу мизгелләр күп булды  бәйрәмдә.

     – Бүген без 24 баланы тормышның янә бер баскычына күтәрәбез. Мин балалар бакчасын балачак вокзалына тиңлим. Һәр ел  безнең хезмәт җимеше булган кадерле чыгарылыш  төркеме балаларын  – мәктәпкә озатабыз,– диде кичәнең йомгаклау өлешендә балалар бакчасы өчен җан атып йөрүче бакча мөдире Гүзәлия Галләмова. – Алар безнең горурлыгыбыз.

       Истәлеккә  балаларга дипломнар, бүләкләр тапшырылды. Соңрак бакча бусагасын атлап чыгып, төсле шарларны зәңгәр күккә очырдылар. Шушы очып киткән шарларга карап, балалар бакчасында узган мизгелләрне искә төшереп, әти-әниләрнең, тәрбиячеләрнең, балаларның күзләре яшьләнде. Чөнки алар балачак иле белән саубуллашты. Ак юллар сезгә, балалар! Сезне тылсымлы белем дөньясы  көтә!